Niyə lavanda pişiklər üçün ölümcül təhlükəlidir - SƏBƏB

Lavandanın ətri insan üçün sakitləşdirici təsir göstərsə də, pişiklər üçün son dərəcə təhlükəlidir. Hətta bu bitki və ya ondan hazırlanan məhsullarla ən cüzi təmas belə, pişiyinizin zəhərlənməsinə və ciddi sağlamlıq problemlərinə səbəb ola bilər.

Loading.aZ bu barədə ətraflı məlumat verir:

Niyə lavanda pişiklər üçün təhlükəlidir?

Lavanda, ev baxımında və aromaterapiyada məşhur olmasına baxmayaraq, pişiklər üçün toksikdir, bu barədə Ukr.Media yazır. Lavandanın tərkibində pişik qaraciyərinin parçalaya bilmədiyi linalool və linailasetat birləşmələri var. Bu, hətta az təsir zamanı belə pişiyin orqanizmində toksik maddələrin yığılmasına səbəb olur. Xüsusilə lavandanın efir yağları təhlükəlidir, çünki onların tərkibində aktiv maddələrin konsentrasiyası çox yüksəkdir.

Lavanda ilə təmasda pişiklərdə hansı zəhərlənmə əlamətləri olur?

Zəhərlənmə əlamətləri arasında: qusma, həddindən artıq ağız sulanması, iştahasızlıq, ruh düşkünlüyü, halsızlıq və nəfəsalma çətinliyi var. Ağır hallarda qaraciyərin ciddi zədələnməsi mümkündür. Bundan əlavə, lavanda ilə təmas pişiyin dərisində allergik reaksiyalar – qaşınma, qızartı və ya səpki yarada bilər. Hətta lavanda efir yağı buxarını udmaq, xüsusilə tənəffüs yolları xəstəliyi olan heyvanlarda nəfəs yollarında spazmlara səbəb ola bilər.

Pişiyinizi lavandanın təhlükəli təsirindən necə qorumaq olar?

Riskdən qaçmaq üçün pişik sahiblərinə lavandadan evdə tamamilə imtina etmək tövsiyə olunur. Əgər bu mümkün deyilsə, bitkini və ondan hazırlanan məhsulları heyvanların çata bilməyəcəyi yerlərdə saxlamaq və onların yanında heç vaxt lavanda efir yağlarından istifadə etməmək vacibdir. Hər hansı zəhərlənmə əlamətləri müşahidə edildikdə, dərhal baytara müraciət etmək lazımdır.