Alimlərdən yeni kəşf - Arılardan istifadə edib GPS hazırlayırlar

Alimlər bal arılarının naviqasiya qabiliyyətindən ilham alaraq son dərəcə az enerji sərf edən GPS çipləri hazırlayır.

“InsectNeuroNano” layihəsi çərçivəsində tədqiqatçılar toxum boyda və mikrovat səviyyəsində enerji işlədən prosessorlar hazırlamağı hədəfləyir.

Alimlər bildirir ki, bal arısının beyni eyni işi görən müasir prosessorlardan təxminən bir milyon dəfə daha səmərəlidir.

Lund Universitetinin rəhbərlik etdiyi komanda ənənəvi süni intellekt əvəzinə nanofotonik dövrələrdən istifadə edərək təbii intellekti təqlid edən, əlavə hesablama gücünə ehtiyac duymadan mövqe müəyyənləşdirə bilən çiplər üzərində işləyir.

Layihə uğurlu olarsa, bu texnologiya çirklənməni təmizləyən, tikinti aparan və ya tozlaşmanı artıran avtonom mikro robotlarda tətbiq oluna bilər.

Bununla belə, ekspertlər bu sistemlərin real istifadəyə verilməsi üçün təxminən 10 illik inkişaf mərhələsi lazım olduğunu qeyd edir.