Bu gün Azərbaycanda Bilik Günüdür

Azərbaycanda 2,2 milyon nəfər təhsil alacaq

Azərbaycanda sentyabrın 15-i Bilik Günü qeyd olunur. Yeni tədris ili ilə əlaqədar Azərbaycanın ümumi təhsil müəssisələrində ilk dərs günü başlayır.

Loading.az xəbər verir ki, 2026–2027-ci tədris ilində Azərbaycanda ümumilikdə 2,2 milyon nəfər təhsil alacaq. Onlardan 1,7 milyondan çoxu ümumi təhsil müəssisələrinin şagirdləri olacaq.

İşğaldan azad edilmiş ərazilərdə 15 məktəb fəaliyyətə başlayır

Bu il işğaldan azad edilmiş ərazilərdə də yeni təhsil müəssisələri fəaliyyətə başlayır. Həmin ərazilərdə 15 təhsil müəssisəsinin istifadəyə verilməsi nəzərdə tutulur.

Bakıda 500 mindən çox şagird dərsə başlayır

Bakı Şəhəri üzrə Təhsil İdarəsinin (BŞTİ) məlumatına görə, paytaxtda yeni tədris ilində 500 mindən çox şagird məktəbə gedəcək. BŞTİ-nin tabeliyindəki ümumi təhsil müəssisələrində 504 mindən çox şagirdin təhsil alacağı bildirilib. Onlardan 39 mindən çoxu birinci sinif şagirdləridir.

İlk dərs “Şəhərsalma və Memarlıq İli”nə həsr olunacaq

Yeni dərs ilinin ilk dərsi “Şəhərsalma və Memarlıq İli” mövzusuna həsr olunacaq. Məktəblərdə ilk zəng çalınacaq və minlərlə uşaq ilk dəfə məktəb həyatı ilə tanış olacaq.